Yaa ilma koo na dhageessaa?
Mee yaadadhu isa kaleessaa
Ganda jooree liqeeffadhee
Dugda-fuudhee kireeffadhee
Qullaa deemee sitti uffisee
Ququnca’een si guddisee.
Qorraafi hongeen waxalamee
Cabee lafatti dabalamee
Qotee, ciree, haamee, dha’ee
Fooniin dhumee lafee ta’ee
Daalachaa’ee bifa fixee
Gaara ba’ee kattaa lixee
Rakkina koon bor sitti obsa
Jedhee jooree dafqa cobsaa
Dhiiga yaaddootiin of jiisee
Gidirfameen si barsiise.
Nama si gochuuf dhabee deegee
Naaf dhaabbatta se’een eege.
Ati garuu korma namaa
Na dagatte - daguu hamaa
Hojiifi bultiin liqimfamtee
Akka gumaa fagootti hafte.
Imaanaa nyaatte akka hattuu
Na hin barbaaddu - na hin gaafattu
Cabeefi meelladhee koo hin beektu.
#Kutaa 1
@Nasiro_inspire
@Nasiro_inspire
@Nasiro_inspire
Join đ±đ godhaa
No comments:
Post a Comment
Thanks for all